مناجاة بدنا عيسى

مناجاة  بدنا عيسى
يا رب بدنا ترجعلنا عيسى ؛ عيسى ابن فلسطين اللي علمنا انه عبادتك جنة وإنه فلسطين جنة عبيدك ؛ لما كان عنا طرد الجن من أرضنا وطرد الحقد من قلوبنا ؛ وعلمنا من علمك : أنه العصفور بوكل وقعة وقعة وما بخاف من القطعة ؛ ما بحوش لبكرة  لأنه في رب اسمه رزاق كريم . كانت فلسطين بلد السمن والعسل وزيت والخبز وأهلها عمرهن ما جاعوا  ؛ واللي ما بزرع بدشر بالخلا وبلقط مع الشنار عشب وورد وثمار ؛ عيسى قال لنا كلوا واطعموا وبكرة الله ببعت بدل الخير خيرات ؛ بس يارب جعنا وصار بدنا عيسى ؛ عيسى اللي عاش عخبزة وزيت وزعتر وين بالك صارت منقوشتك يا عيسى ؛ الزيتون مسور بحيطان وزعتر الخلا مناطق عسكرية مغلقة ومكاثي القمح صارت مستوطنات للصهاينة ؛ صرنا نوكل مستورد بيجينا معلب ومثلج وما في مصاري ؛ طفشن العصافير من  القلة ؛ وحتى الخروب غطوه بشاش ؛ واللي بجوع بدوا يدفع شوية وشويات حتى الحسون بطل يطل وهرب قبل الكل ؛ آه يا ربي البطن الجيعان كيف بصلي والكف البردان كيف بدعي ؛ ولسه فوق هذا صهاينة لا بدها تموتنا ولا تعيشنا ؛ يا رب رجعلنا عيسى تبعنا  وعيسى سبب وأنت ربه وربنا ؛ لما ترجعه عنا بندير بالنا عليه ؛ وبنرد عليه  وبنعرمه على بوظة ركب برام الله وكمان كنافة زلاطيمو وبالمرة جاح مشوي عند كعبر بضله فلسطيني وكان متغرب عندك يا  الله بس احنا كمان متغربين يبقى في حدن رح يعزمنا بعدين أنه أنت يا الله  بفلسطين زي ما أنت يا  الله بكل مطرح و أنت يا الله بتحبنا وبتحب اللي بحبنا وأكيد رح تبعت عيسى قريب لنوكل كنافة وبوظة ونطر الصهاينة برة ونعمل دبكة راسها بغزة ولويحها بعين الحلوة وجحشة بالوحدات ونرفع علمنا بالعالي علمنا الكديم لون الأرجوان يعني بنفسجي وما يضل حدا لا بس أسود ـ لأنه لبسوا حزن ع فراق عيسى -  وأكيد وقتها بتنام العنزة بحض الضبع وبتبطل الشمس حامية ولا رح يضل برد كل أيامنا ربيع ومن غير نوار لإنه عندي حساسية ؛ أو يمكن عيسى يمسح صدري وأطيب،  هو لازم يداوينا زي ما زمان داوى جدودنا ؛ وإنه دوانا بسيط نوكل ونشرب ونام في فلسطين ،  يعني بلدنا زي ما كل الناس الهم بلد برضه احنا النا بلد،  آه اسمها فلسطين فيها مي وأكل وهوا يعني بنقدر نعيش زي ما الناس بتعيش ببلادها،  بس الصهاينة انطرهن بره ؛ كرمال كل اللي بتحبهن بالدنيا وكرمال سيدنا محمد كرمال الناس لمعترة ابعتلنا عيسى يا رب يا حببينا تعبنا بدنا نعبش ونعبدك ورح نطرد الا ما بعبدك بره لإنه فلسطين بركتها إنها بتصلي الك كلها ؛ وهيي اللي علمت الدنيا كيف تعبدك ؛ بدنا نرجع ع فلسطين تيرجع الدين لالك يا ربي مش لهبل المشايخ اللي حرفوا الدين زي ما صهاينة حرفوا التاريخ يا ربي بحبك وبضل أحبك وصابر لترجع عيسى تترجع فلسطين ونرجع احنا ع فلسطين
خالد ابوعدنان
ولدت لاجئا وأحيا مهاجرا